Jä, wär steggt do ächt drhinter?

Zwei Baschtler. Zwei IT-Geeks. Zwei Fasnachtsliebhaber, eine Gugge-Drumpeeter und dr ander Ex-Drummler. Zwei Quasi-Bänggler. Und Möchtegärn-Schauspiiler. Und Hobby-Gschichtlischryyber. Irgendwie alles so e bitzli und nüt richtig. Aber das isch guet so und alles e bitzeli zämmemische isch sowieso unseri grossi Passion.

Unsri Näme sin Marco “Oschti” Osterwalder und Lukas “Luba” Mäglin.

Eigentlig hätte mer jo grundsätzlig nid z’ wenig z’ due. Aber wär hett das scho, gäll. Aber denn isch kurz vor Wiehnachte öbbis passiert, wo e Fungge entzündet hett. Me stell sich vor: Unseri Bude hett ‘s Wiehnachtsässe wäge däm Gnulleri-Virus miesse abbloose. Aber irgendöbbis hämmer doch miesse mache!
Und denn hämmer ys no zwei Kumpane gschnabbt und das Speggtakel do ufzooge:

www.cyon.ch/blog/Anleitung-Remote-Weihnachtsfeier

Jo … und wie ‘s halt amme so isch, hett ‘s eint denn zum andere gfiehrt. Mir hän im Januar 2021 mit 2 andere Nase offiziell d’ Projäggtgruppe namens Ludwig Arts gründet.

Aber zrugg zur Fasnacht: Uns isch denn die (offesichtligi) Idee ko, dass vieli Fasnächtler jo gar nüt z’ due hänn Ändi Februar … villicht sogar frey gnoh hän .. und irgendöbbis bruuche zum sich fasnächtlig z’ verdue. Et voilà, do simmer scho aglangt by däm 2-Persone-Ludwig-Arts-Spinoff.

Öbbis zum eim wider emool ‘s innige Gfühl vom Intrigiere, Bänggle, Schränze, Ruesse, Pfyffe, Källerle und Gässle verspüre loo. Zwar uf e anderi Art … aber unsri Bärner Kollege würde jetzt sage: Gäng sovüu!

Aso los! Mache mer doch statt Triebsal bloose eifach zämme …

Ainewäg e bitzeli Fasnacht!

Eure Oschti und Luba