D’ Gschicht
D’ Frau Fasnacht hett ‘s aktuell schwär. Si isch scho dur die letschti Nid-Fasnacht 2020 stargg agschlaage und haltet sich nur no mit Mieh und Not uf de Bei. Dr Fasnachtsvirus mag sich nümme so rächt verbreite. Derfür wietet dä anderi unsägligi Virus au 2021 immer no wytter und git ere dr Räscht. Do ka nur no e riisigs Wunder hälfe. As letschdy Verzwyyfligsdaat rieft sy ihre alte Fründ, dr Basler Schriftsteller, Fasnachtskenner und Fasnächtler Rudolph “Bolo” Mäglin uf dr Blatz zum ihre Untergang abzwände.
Und plötzlig materialisiert dr Bolo tatsächlig in sym alte Fasnachtskäller und griegt d’ Uffgob überdreit, sich dört ummez’luege und in verschideni Zytte und Szenarie z reise zum wichtigs Wüsse lebändig z’ bhalte, d’ Gschicht e weeneli umzschryybe und wärtvolli Fasnachts-Artefakt z’ requiriere. E spannendi Schnitzeljagd durch Ruum und Zyt nimmt ihre Lauf.
Und dir dörfet ihn derbyy unterstütze. Denn nur zämme mit euch mags em Bolo glinge, ‘s Fasnachtsfüür wider zum Lodere z’ bringe.
Corona … dyni Macht verblasst im Aagsicht vo dr Frau Fasnacht!
Was euch erwartet
- Gmeinsams Schwelge in Fasnachtstimmig
- Interaktivs Stüüre vo dr Hauptfigur per Dryyriefe imene nostalgische Fasnachtskäller
- Interessanti Fakte und luschtigi Anekdote rund um d’ Fasnacht
- Kreativi Spiilylage und Rätselspass
- Und z’ letscht aber nid ‘s Allerletscht: D’ Gnuegdueig, corona-konform d’ Fasnacht grettet z’ ha!
Was dir bruuchet
S’ interaktive Abentüür rund um d’ Rettig vo dr Fasnacht findet komplett online statt und bietet dir und dyne Fründe und andere Fasnachtsbegeischterte ‘s perfäggte Corona-Alternativ-Programm.
Und vorallem: E gleins bitzeli Fasnacht. Ainewäg – odr grad ebbe drum!
“Ainewäg e bitzeli Fasnacht” isch nid nur komplett Corona-konform sondern au absolut sorgefrey. Ihr bruuchet nüt wytters als:
- Freiwillig (abr subber): E gmietlige Dringg us em huuseignene Sortimänt, wär Luscht hett, e Goschdyym und hejo – me hett e Blagette!
- Nötig (und erscht no gratis): Zoom, e bekannti Meeting App.
- Am Allernötigschte: E weeneli sehr viel bitzeli Luscht uf Fasnacht. 😉
Um dr Räscht kümmere mir ys!
Wie das ganze ablauft
- Ihr mäldet euch bi uns via Kontaktformular und dailet uns d Aazahl Persone und eure Wunschtermin a. Mir mälde uns sobald wie möglig und mache denn die wyttere Sache ab.
- E Viertelstündli vor em abgmachte Termin begänd ihr euch per Link in e Zoom-Ruum (bitte syget nid z’ spoht).
- Zum abgmachte Zytpunggt gohts los!
- Ihr lähnet zrugg und löhnd euch ca. 2 bis 2½ Stündli lang ine nostalgische Fasnachtswält entfiehre.
- Am Schluss könnet ihr euch denn no per Zoom nach Luscht und Luune e weeneli unterhalte und dr Event, in Erinnerige schwelgend, usklinge loh.
D’ Konditione
- Mindeschtdailnähmerzahl: 6 Nase
- Maximal sinnvolli Dailnähmerzahl: Öbbe 30 Nase (ab denn wirds e bitz chaotisch)
- Mindeschtalter: 12 Joor
- 20.- Fränggli pro Nase (e Solidaritätspryys, zum wenigschtens e bitzeli koschtedeckend sy)
- Spiildate: Start isch ab 18. Februar. Die vorgsehene Zytte wäre 17:30 + 20:30.
Donnschtig und Sunntig sin unsri Ruehedääg. Falls das nid passt, könne mer zämme nach Alternative luege. - Mir spiile bis am Frittig dr 12. März (Derniere)
Achtung: Unsri Spootvorstellige (20:30) sin leider usbuecht.
Die letschti verblyybendi, frey Spootvorstellig zur Derniere (Fryttig 12. März) mache mir Open House, damit alli no mitmache könne,
wo Luscht hänn (max. 30 Persone). D.h. d Mindestteilnähmer-Azahl entfallt denne, es könne also au Einzelmasgge derbyy syy.
Luscht bykoo? Denn könne dir euch unverbindlig bi uns mälde und mir bespräche d’ Details.